La Usc di Ladins

Per l nono an rua a Moena l’ACF Fiorentina. Dò n an de paussa, per via de la pandemia, la squadra viola passarà endodanef doi setemènes tel paìsc fascian, dai 17 ai 31 de messèl, per se enjignèr per l campionat de serie A che tacarà ite ai 22 de aost. L ciamp sportif Benatti é stat enjignà, de gra a la colaborazion del Comun de Moena, US Monti Pallidi e Apt de Fascia, con duta la strutures che l’é de besegn e l’é stat fat sù ence l Viola Village. L ritiro vegn fat tel respet de la regoles anti Covid e donca la jent podarà jir a veder i alenamenc, che sarà da doman da les 9.30 e domesdì da les 16.30, demò con autozertificazion de bona sanità e mascim de 500 persones. L Viola Village l’é avert duc i dis con jeghes e stands e se pel jir ite con la mesurazion de la fiora.

Per chel che vèrda la cater partides da peconc, che sarà ai 20, 25, 29 e 30 de messèl da les 17.00, podarà jir ite fin a mile persones (50% respet al numer de jent che podessa ite) con Green pass o con tampon negatif fat te la 48 ores inant de ogne partida, i biliec se pel i comprèr demò online su TicketOne.

La Fiorentina, vidèda dal nef mister Vincenzo Italiano, sarà ghesta ence chest an a l’hotel Dolce Casa de Moena che é stat smaorà e renovà. »Endèna l ritiro de la squadra viola – à dit Massimo Sottopietra, patron de l’hotel Dolce Casa – vegn metù a la leta na sala restorant demò per i jiadores e staff tecnich a na vida che i pel stèr per sie cont zenza se encrojèr coi ghesć de l’hotel. Chest an la squadra se tol dò, apede al chef che ge fèsc l magnèr adatà, ence n maitre. A desposizion di viola, apede che doi partimenc entriesc de cambres de l’hotel, ence l teater da 80 posć olache i jiadores e l staff podarà veder i video di alenamenc e de la partides, na sala per scontrèdes, sala per massajes e doi nodadoes.«

De più su La Usc de en vender ai 23 de messèl.   

 (MCI)