La Usc di Ladins

La pissèda per n liber sensorial interladin per picoi bec la é peèda via da l’Uniun Ladins Val Badia. N lurier empegnatif con n percors ence belebon tribolà, ma che tinultima à garatà. ‘L picol becalegn’ l é l nef liber portà dant enstadì ence te noscia Val. Te na dejina de piates con de bie dessegnes a colores a èga fac da la gherdenera Johanna Kostner vegn contà la contia scempia de n picol becalegn.

Tedò a la contia, metuda ju da la fascèna Melissa Locatin, conseiera de l’Union de Fascia co-editora del liber, e Anna Laimer de Gherdena, se scon n lurier pedagogich e didatich. »Aon cernù n stel de schertura scempie con tante ripetizion che deida i bec a emparar le costruzion di pensieres. Aon cernù n ambient da chiò entorn, l bosch, e i fac conté te la contia é giusć a livel scientifich e se pel donca emparar zeche de real. I colores di dessegnes à tonalità belebon chiare che se lea a la natura e le deida a se relassar«.

L liber l é fornì con n modul sonor sostegnibol fat de legn, che a l bater l reprodusc l son del becalegn. »Per ciapar la zertificazion europeana, de obligh per i prodoc ouc a picioi, aon spetà dassen n muie de temp, l é stat n gran lurier burocratich vindedò e empegn economich. L modul ge dasc na part de manualità al liber, emportanta per i bec picoi«.

Vedù l gran e bon ejit, l é en program na neva prejentazion tel chèder de l’Aisciuda Ladina. Endèna duc i enteressé pel troèr l liber da comprèr ite a Sèn Jan, te senta de l'Union d Ladins de Fascia, visavì l Hotel Dolomiti.

De più su La Usc stampèda de vender ai 31 de mèrz.  (Nico)