La Usc di Ladins

Descheche aede podù lejer su La Usc soraldut te la ultima setemènes, l é stat metù endodanef a jir do n bon trat de temp la Ladiniatour. L event musical, semper endrezà da la Union Generela di Ladins dla Dolomites, à n passà che ge fèsc onor: ite per i egn Nonanta sacotenc gropes e artisć se aea ejibì sun chesta paladina, portan dant inovazion e neva sonoritèdes tel panoram de musega ladina. 

La Ladiniatour, te chesta otava edizion che vegn portèda dant chesta fin de setemèna, vel restèr n event fresch e matuscel desche enlouta… zeche de mat! Resta la medema volontà de slarièr fora musega ladina moderna e donca ence l envit a la neva generazions a se dèr ju col lengaz de la mère per scriver sia melodies.

Apede ai conzerc de anché a Ortijei e de en domenia a La Ila, te Fascia l apuntament per la Ladiniatour l é doman, en sabeda ai 23 de setember da les 20.00 lo dal chino Marmolèda de Cianacei. Sun paladina sarà i gropes fascegn PopCorner e Love in Lions, e belimpont ic sion jic a domanèr fora en cont de sia atività musicala. Se ejibirà apede a ic ence autra cinch formazions da la valèdes ladines: Acajo, Aurela cörta, Julian and band, Vidalong e Ethnic Techniques. Amò apede sarà n ghest spezial: duc chenc maravearà l publich moscian cotant sorì che l é se emprevaler de nosc lengaz ladin per stii de musega dalbon desferenc anter ic. 

Podede troèr i biliec da comprèr ite online al link reservation.ticketleo.com/event/26708/ladiniatour-2023, opura ence doman al chino. No mencià!  (Nicoletta Riz)