La Usc di Ladins

L ultim an l é stat pien de atività e novitèdes per l’Union di Ladins de Fascia vidèda dal president Fernando Brunel, che giusta acà n an la portèa dant na bela mostra e n liber per valorisèr la fegura del artist Tita Pederiva Batiston da Soraga. Chest’aisciuda la radunanza à aproà l nef Statut, che à mudà en pèrt ence la gestion del tesserament di sozi (che anchecondì i é zirca 300) e la formazion del Consei, e ades la sociazion se enjigna a la litazions del nef diretif e la envia duta la jent de Fascia a se arvejinèr per poder la cognoscer miec, tor pèrt a sie empegn e portèr idees e proponetes.

Anter duta l'autres ai 29 de otober l é stat endrezà a Cianacei la Festa de Rengraziament, con la bela messa ladina e la recordanza te Cèsa de Comun, é stat dedicà chest an a Ezio Anesi, se n jit acà 30 egn. Per chesta ocajion l’Union di Ladins, con sia conseiera Lucia Gross, l’à metù ensema n liber de 240 piates per fèr memoria de chi egn e de dut chel che Anesi à fat, scrit e dat per sia comunanza. La publicazion vegn prejentèda te sala del Consei de Comun de Sèn Jan en domenia ai 3 de dezember da les 4 domesdì, con na meisa torona per descorer de l’arpejon che l prum conseier e senator fascian ge à lascià a noscia comunanza e de coche se pel la portèr inant. 

Apontin te chesta ocajion ai 3 de dezember l’Union di Ladins de Fascia averjarà ence la litazions per l nef Consei. Duc é envié a vegnir jà chisc dis te la senta de l’Union di Ladins a Sèn Jan per fèr o renovèr sie tesserament. A chesta vida se pel palesèr l sostegn a l’atività de la sociazion, aer en don o con de bie rebasc la publicazions de l’Union e ence litèr e se candidèr per fèr pèrt del nef Consei. 

L é emportant l contribut de duc, acioche la sociazion ladina storica, che del 2025 la compirà 70 egn, posse seghitèr a crescer e col didament de duc a troèr fora e portèr inant scomenzadives per tegnir vives l lengaz, la storia, la cultura, l’identità e la tradizions ladines. Se pel aer ogne autra informazion tel ofize de l’Union di Ladins a Sèn Jan, sun stradon visavì al Hotel Dolomiti, ence per telefon al 0462 764545.

De più su La Usc stampèda de vender ai 24 de november.