La Usc di Ladins

En domenia ai 19, en Pèsca de Mé, l temp à fat sia bona pèrt tel fèr garatèr l pelegrinaje tradizionèl di fascegn forin Baissiston. N muie de pelegrins é rué a preèr la Madona di Set Dolor, chi col auto per sie cont, chi en grop col pulman e fajan magari n toch a pe, da Lavazé o da Aldin. No l é stat enveze possibol fèr la Via Crucis ladina da Neva Todescia, descheche aea proponet l’Union di Ladins de Fascia, ajache proprio lo te chela domenia i boschieres era do a taèr èlbres.

N muie de jent à vardà con curiosità i servidores col tribol e la crousc, la bandiera ladina e i confalons bie da color de duta la parochies de Fascia, i bec de la Pruma Confescion e chi de la Pruma Comunion con si guant bianch compagné da catechistes e catechisć e dapò don Andrea, don Mario, don Erminio e l diacon Antonio e i joegn de la Creisema e di oratories con si animatores: segnes de na tradizion religiousa doventé oramai rères ence chiò e vardé con marevea.

La curta procescion à vareà l vièl e dapò passà fora l piaz del santuarie per se n arloèr envers l’entrèda maora de la gejia e inant che ruèr ite n tormen de vent, che à ence fat sgolèr vèlch confalon, à fat entener che l Spirit Sènt con sia forza compagnèa i pelegrins fascegn a gejia.

La messa, vidèda da don Andrea ensema coi etres preves, é stata ofizièda chest’outa daite, e no percheche l temp no aesse permetù, ma percheche la paladina de fora la era piena de feres: nesciugn colafora aea pissà de la librèr.

De più su La Usc stampèda de en vender ai 24 de mé.


 (Lucia Gross)