La Usc di Ladins

L é stat na scontrèda caraterisèda soraldut da numeres, chela del Consei del Comun General de Fascia chiamèda ite dal president Cristoforo Debertol en lunesc ai 20 de mé, a la prejenza de 16 conseieres, giusta l numer legal. 

L President à salutà e rengrazià i prejenc, anter chisc ence l conseier provinzièl e assessor regionèl ladin Luca Guglielmi.

Dapò la parola é jita sobito al conseier de procura con delega al bilanz Riccardo Donei, che do aer rengrazià l ofize di conc del CGF e sie responsabol Sandro Mazzel l à portà dant a na vida chièra duta la zifres. L rendicont del 2023 va fora sui 10 milions de euro, caraterisà per chel che vèrda la entrèdes en gran pèrt dai trasferimenc ordenères, 7 milions e mez en dut, che vegn da la Provinzia (4,5 milions), dai Comuns de Fascia per intervenc a gestion unitèra desche chela del refudam (2,5 milions) e amò per zifres mendres da la Region per la mendranza ladina e da l’APT per l Skibus. Apede ai trasferimenc l é pech più che n milion de entrèdes extratributères, 150 mile euro de entrèdes en cont capital e 940 mile per partides zircolères. 

Anter la speises, a fèr la pèrt del leon l é cheles per la gestion ordenèra, che tol ite dependenc e steores e les passa via i 8 milions; anter dut i cosć rua a 10 milions 317 mile euro.

L arvanz de aministrazion l é de 6 zirca milions, praticamenter medemo a chel del an dant: scioldi che servirà per l projet de restruturazion de la veia caserma Vittorio Veneto, destinèda a doventèr la neva senta del ent.

De più su La Usc stampèda de en vender ai 24 de mé.  (Lucia Gross)