La Usc di Ladins

L é passà 80 egn da la fin de la Seconda Vera e la Scola Interregionèla ‘Le Muse e le Dolomiti’, te chest cedean de comemorazion, la vel portèr dant n spetacol leà a chi tempes scures. Se trata de n’opera lirica per oujes biences, de joegn e strumenc, componuda a Praga ti egn ’30 e la conta la storia de doi frèdes Aninka e Pepicek, che didé da trei besties magiches e n muie de amisc, é bogn de scombater l catif Brundibàr e salvèr la mère malèda. L titol de chesta opera scrita da Hans Krasa l é belapontin Brundibàr e la vegnarà portèda dant al teater de Navalge en mèrtesc ai 5 de aostda les 9 da sera. 
L event é stat prejentà da la Maestra e presidenta de la Scola Interregionèla ’Le Muse e le Dolomiti’ Oda Zoe Hochscheid, la vizepresidenta Elisa Tabiadon, l regist Giacomo Gamba, l artist e scenograf Dunio Piccolin e n grop de bec che dantfora à fat na curta ejibizion, i bec e la bezes che chest an à tout pèrt al concors Franchino Gaffurio te la Lombardia e i à vent la Fascia d’Arjent. 
Chesta opera, che é stata portèda dant 55 outes del 1943 e del 1944 tel ciamp de conzentrament de Terezien, vel uzèr fora n messaje fort che met dantfora la resilienza, l’emportanza de se didèr l un col auter e la forza che nasc canche se é duc ensema.

Se pel lejer dut su La Usc nr 29 dal prum de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Monica Cigolla)