La Usc di Ladins

Va inant l percors de l’APT de Fascia per arjonjer la zertificazion GSTC (Global Sustainable Tourism Council), n standard internazionèl per aer n turism più responsabol. Te chest percors l é stat tout ite realtèdes publiches e privates, sentadins, aziendes e profescionisć de la comunanza e de categories economiches e sozièles desferentes. I se à binà en mèrtesc ai 9 te sala grana de la Sorastanza per la seconda scontrèda e l é stat metù dant i pilèstres luré fora te la pruma scontrèda desche proponetes per l Pian strategich de gestion sostegnibola de la destinazion. Spartii te de picoi gropes aldò de la tematiches, i partezipanc, con desvaliva esperienzes e sensiboltèdes, à abù l’ocajion de se confrontèr su la idees metudes ju te la pruma scontrèdes e de svilupèr na sort de pian de azion per arjonjer i obietives fac fora, metan ju tempistiches, responsabilitèdes e ressorses. L zil? Esser bogn de troèr soluzions pratiches a besegnes reèi.

Se pel lejer dut su La Usc nr 36 dai 19 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Nicoletta Riz)