La Usc di Ladins

En vender ai 4 de setember l é se n jit Genia Pegoretti de Menudol, da duc cognosciuda ence desche Genia da Parèda. 
Na manconia che lascia n gran vet te la comunanza de Cianacei: Genia é stat per egn a la longia na prejenza ativa e propositiva, semper vertia a didèr fora e a tor pèrt con sie contribut a la scomenzadives de paisc. 
La didèa te vigni scomenzadiva de paisc, da la sègres a la festes, la é stata promotora del Grop de la fortaes e sie grostoi era da duc recognosciui anter i miores. Sia braura tel cojinèr l’à portèda a tor pèrt bon en lonch ence a la trasmiscion radio Che metone pa anché sorafech de Monica Cigolla.
Amò apede Genia à didà a tegnir neta e rencurèda la Gejia de Sèn Florian per sacotenc de egn. Tropa families se recordarà de ela ence per chi bie pocegn de lèna che la fajea a maia e che la donèa a vigni piciol o piciola giusta nasciù.
L era na femena muie leèda a sia tradizions, soraldut al Grop Folk, de chel che la é stata pèrt fin dai egn ’60, dant tel Grop de Folklor de Cianacei e do tel Grop Folk de Dèlba, Penia, Cianacei e Gries: no l’à lasciù su nience canche la aea i bec picoi. Genia ge tegnia che fossa dut bel rencurà, che ciufoi, cordeles e gramièi fossa derturé e en orden, e se la vedea zeche fora post, la comedèa sobit e la ge ensegnèa a chela più joenes. Speron che tropes tolarà ejempie e portarà inant la ritajon che ne à lascià Genia, che ades paussa te la pèsc del Segnoredie.