La Usc di Ladins

En vender ai 28 de aost la comunanza de Soraga e n muie de jent ence da fora de paisc à compagnà Paola Follador te sie ultim viac su la tera. La gejia era piena de jent, te ogne piz e cianton, ruada per se strenjer apede a la familia. N tumor al pancreas se l’à portada demez massa prest, l’aea demò 58 egn, la se à destudà ai 26 de aost. L’à scombatù fin tinultima con soa gran forza, so spirit algegher, semper grignolenta, con na batuda e na bela parola per duc. Paola l’à lurà per 28 egn a la scolina de Soraga e la era n muie ativa ence te la comunanza, semper vertia a didar: tel grop de le Scoe, le femene che va a netar la gejia, con la catechesi, con i joegn, con l Comitat manifestazion che l’à recordada con n post su Facebook.
La maestra Margherita Chiocchetti, a la fin de la messa de sepoltura, l’à saludada e rengraziada a inom de dute le maestre de scolina. »Ciao ‘Paola con i veiares’ descheche te chiamaa i bec de Soraga. Tu e Giacinta aede tout dant e petolà n muie de picioi. To grignot dajea legreza e engaissaa duc, canche tu ruae a scola l era duc che corea per te far n braciacol. Tu es semper stata desponibola, tu ere semper tedant per ne didar.«

De più su La Usc stampèda de en vender ai 3 de setember del 2026  (Monica Cigolla)