La Usc di Ladins

L Comun da Col l à deliberà de conzede contribuc a font pardù per le dite picole dei setor del comerz, turismo e artejanat del comun da Col, per sostignì le aziende che da n servije slargé fora sul teritorio incia nte sto moment de gran criji economica portada dal Covid-19: sti soldi i é stai mitui a dispojizion dal DPCM del 24 de settembre del 2020. Per l 2020 l é stat mitù a dispojizion con n bando aposta 16.549 €, e per l 2021 e 2022 l é pervedù 11.033 € per ogni an che i vignarà dai fora con de auter bandi aposta. Pol fà domanda de contribut le dite picole che faje atività economica, comerciale o de artejanat, che abe sua senta de laoro ntel comun da Col, che le siebe regolarmente scrite ite ntel registro de le impreje e che no le siebe n stato de liquidazion, faliment o intan na prozedure de faliment. N pi le dite e i suoi raprejentanc i à da ester n regola co la normativa antimafia, ester n regola col pagament de le tasse, de le paghe e dei tribuc comunai e no ester stai condanai per reati ai dagn del Stato che ruine la moralità de la persona. Ogni dita la podarà prejentà na domanda sola, che l avarà da ester mandada domà via PEC al indirizo protocollo.comune.collesantalucia.bl@pecveneto.it davan le 12:00 del 29 de genaro 2021.
L bando intier se pol l ciatà al indirizo https://www.comune.collesantalucia.bl.it/myportal/C_C872/home .




Martino Pezzei