Söl iade da Badia a Augusta ai tëmps dl Covid-19

Data

07 de auril 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Rodé incërch n’é da n ann incá dessigü nia l’ativité plü desfirada. Gonot êl bele tröp de fat, por ejëmpl d’aisciöda dl ann passé, sce an jô da porta fora
Sëgn él l’internet che coliëia la majera pert dles porsones, an ne mëss nia plü se sposté por jí al’université, tó pert a sentades, o ascuté sö convëgns, döt chësc sozed te stüa. An impëia le computer y spo pó nosta usc rové dal’atra pert dl monn. Sambëgn n’él nia le medemo co ester de porsona söl post, mo sëgn n iade éra insciö. Rodé incërch ê dan da püch val’ de bindebó normal y saurí, sëgn indere l’á na situaziun pandemica mudé te val’ de desman y da tó ca ma sce ara mëss ester.

Lascé la valada é n pü’ sciöche zacan
Por tröc caji n’él nia conzedü da lascé la valada, mo sce an le fej por laur, stüde o motifs de sanité spo vára da pié ia. Ci che i m’á intenü da mia esperiënza ch’i á fat dan otedé, é che la vita é bëgn n gran mister. Ci che te n’esses mai dit che mudass, se trasformëia fora de n aiet te na aventöra nöia. Bele s’arjigné ca é döt atramënter: jí dal dotur, se lascé foré n bachët sö por le nes, aspeté le resultat por spo te anunzié tres internet tl Stat che te jaras, dé jö tü dac: olache te vas, por tan de dis, ci che te fejes, yii. Chirí fora i orars dla ferata y cumpré les chertes de iade. Al vëgn aconsié da pié ia adora, por ne rové nia tla nöt y ne messëi nia damané alberch, che á te chisc tëmps scialdi les portes stlütes pro.
Ora che te passes i tuní dla Val Badia y te röies a Mantëna Todëscia, o ciamó deplü canche la ferata te condüj ia y jö por la val de Puster poste prësc te imaginé, l’emoziun de nostes lâs y nüsc neni canche ai rovâ do prësc mez ann indô fora dla valada. Al me gnô bëgn n pü’ da rí a tan de cosses che an mët averda, che denant ne se foss mai tomades tl edl. Odëi indô tröpa jënt che sënta te ferata, incrujé les odlades de porsones che te vëighes por le pröm y l’ultim iade, é bëgn na gran emoziun!

Liéde do deplü dles esperiënzes fates dala studënta y colaboradëssa de La Usc di Ladins Lucia Piccolruaz tla ediziun atuala dl foliet, gnüda fora en Vëndres Sanc!