La Usc di Ladins

Le grup »Jemm Music Project«, sot ala direziun de Max Castlunger, s’á esibí ai 15 de jügn a Algeri, tl cheder di conzerc y di spetacui dl Festival dla Musiga Europea. L’invit é gnü dal’Istitut talian dla Cultura de Algeri y á rapresenté por le grup na ocajiun particolara por tó pert al festival, che zelebrëia le dialogh danter les cultures desfarëntes y la richëza dla diversité musicala. En ocajiun dla 26ejima ediziun él rové adöm artisć y musizisć da set paisc dl’Europa. Chisc s’á esibí sön pala­dina dl »Théâtre Nazional Mahieddine Bachtarzi« de Algeri, se moscedan ite danter i artisć locai.

Danter grups plü liá ala tradiziun musicala de so raiun y d’atri, che lascia pro formes nöies y na fujiun cun stii plü sperimentai, á le grup ciafé le dër’ post te n pro­gram musical de varieté.
»Le program musical che i pitun vá sura i confins dla regiun o dl stat talian fora. Al porta adöm elemënc de musiga tradizionala da döt le monn te na verjiun plü mo­derna y etnica. Al nes é garaté da porté modernité y n punt d’odüda plü sperimental danter les formes de musiga popolara tradizionala presentá dai atri grups«, cunta le musizist Max Castlunger.


Deplü da lí ciafëise tla ediziun nöia de vëndres ai 3 de messé!