La Usc di Ladins

Te otedé ai 2 de jügn 2023 da sëra (dales 20:00) se trasformará le zënter de arpizada Vertikale a Porsenú te n scenar da conzert pop–rock cun le ciantautur Hubert von Goisern y süa band. Le conzert vëgn metü da jí sciöche anteprima dles gares de Copa dl Monn de boulder söl program dai 9 ai 11 de jügn, olache al s’incunta i mius atlec de arpizé a Porsenú. Hubert von Goisern vëgn a Porsenú por na staziun de süa tournée dal titul "Neue Zeiten, alte Zeichen". Tla band de HvG él da plü mëisc incá deboriada dui musizisć conesciüs dla Val Badia: Alex Trebo y Maria Moling. La colaboraziun de HvG cun Alex Trebo ê piada ia püc mëisc denanche la pandemia dl 2020 architass döt cant. Fora dla colaboraziun él nasciü na bela amizizia, che á porté i dui musizisć söl iade a odëi les cités tla Talia de Bologna y Napoli.
A Porsenú saral da aldí musiga y elemënc dal jazz, blues, iodler y rap, da toc publicá dal ciantaurur austriach y cosmopolit ti ultimi albums gnüs fora da püch y dales cianties conesciüdes da desënes de agn de HvG. Les chertes por le conzert che podará gní aldí söles gradinades di milesc de posć dla Vertikale a Porsenú pón cumpré pro la cassa dl zënter Vertikale a Porsenú, informaziuns dá la plata https://climbingworldcup-brixen.it/ y d’atri sic sön internet.

Alex Trebo: "I viri la plü bela esperiënza profescionala!"

La Usc: Alex Trebo, co á pa pordërt metü man tüa colaboraziun musicala y amizizia personala cun Hubert von Goisern?
Alex Trebo: "Chësc tëmp te mia vita ne me desmentiarai mai: Hubert von Goisern m’â telefoné mez ann denanche al rumpiss fora le Covid–19 por me damané mia colaboraziun por so album nü. Sambëgn ái dit atira de sce! I án spo fat la preproduziun de novëmber 2019, de jená sunse spo piá ia cun les registraziuns y le mix, laur che á doré cina de ma dl 2020, avisa tl tëmp che n’ê nia tan saurí por s’incunté y passé i confins."

Liéde inant deplü indoman tla ediziun nöia de La Usc di Ladins!