La Usc di Ladins

Le bel di films é che ai n’é nia reai. Canche la realté te vëgn metüda dant te na manira fitiva, spo ne te dessënera forsc nia mo ara te fej ponsé do. I aturs pó ince te respidlé, iló poste slisoré te sü cialzá y te imponsé ci che te ess fat te süa situaziun.
Nes presentun trëi situaziuns desvalies, de films atuai, che n’á deboriada nia ma le cunté de porsones sburlades te n piz, o nia ascutades dala sozieté, mo ince les reconescënzes ciafades ultimamënter söl scenar internazional.

"Parasit"

Al é le pröm film nia inglesc che á podü pié do, en chësc ann, le Oscar dal miú film. Indöt pó chësta peilcoula cumpedé 4 Oscars y na palma d’or. Le film südcorean é gnü realisé dal regist Bong Joon Ho, tles perts prinzipales él da odëi Hye-jin Jang y Kang-ho Song. 
Al é n film cun na fotografia spetacolara, da odëi ince te nüsc salfs dl chino y sön nüsc monitors dl chino a ciasa. Parasite á na trama scëmpla y dramatica, mo plü che an ciava por abiné fora i significac de val’ momënt, plü se intënon che te 132 menüc de film é sté bun le regist da lié adöm n gröm de tematiches. Nia blances, nia fosces n’é les aziuns di protagonisć, mo ares bala ia y ca sön n cromatism de grisc. Na gran critica ala sozieté y ala politica atuala tla Corea á porté chësc film sön le scalin plü alt.
La storia mët man cun na racomanaziun y n documënt nia falsifiché mo stampé en per de agn danfora, sciöche le protagonist Ki-Woo, nasciü te na familia che "tofa" de meseria, dij. Chësc sará la tle por podëi porvé da mioré la situaziun te chëra che la familia vir, cina che i limic ne vëgn nia surpassá. Jon do a plü planns che la familia se pënsa fora deboriada, por podëi se inalzé de na classa soziala, suzedel fac che n’é gnanca da crëie, che mudará la vita de chëstes porsones por dagnora.
Sciöche le pere dl atur prinzipal dij: "Al é damí da nia avëi planns tla vita, spo ne jarai nia mal". Mo n’é forsc nia nen avëi un, instës n plann?
Tles strades de Seul y te dui contesć dla cité tan desferënc é bun le regist da fá ponsé do, da lié adöm na critica fina che ne te jará nia tan saurí fora dl ce.

Liéde inant döt l’articul tla ediziun atuala de La Usc di Ladins/Auturia: Lucia Piccolruaz