La Usc di Ladins

Ponsun ma positivamonter: en cösc ann é les atletes de Copa dal Monn a Al Plan davëi »primedonne«. Al sará ma agonism, zonza publich, zonza complimonc dal publich, zonza abrac con i fans. Döt tla tele­vijiun internazionala. En cösc iade é le sport al pröm post y al zënter, deache le rest é desdit – baldi! I án la plü bela nëi sön pista, la plü bela contrada encëria, en invern desche al alda da ester aladó de nosta enma­ginaziun naturalistica, mo n'é nia dagnora ensciö.
Na gara de Copa dal Monn zonza publich y fans é en estrem. I estrems ne vá mai bun! Dal ater vers él ince gonot estrems, canche la festa encër na gara de Copa dal Monn é plü emportanta y zercada co les gares y prestaziuns de atlec/atletes: al é plü iadi sozedü che damanenn spo da sëra i fans che co á davagné la gara án ciafé desco resposta: »nos án davagné«...
Ince Kitzbühel, desco por ater Antholz (biathlon), n'á en cösc ann nia fans y nia festa y cosmetica, dötes les tele­cameres é otes söles gares y söi/söles atlec/tles. Che i media trasmët les gares é emportant por döt le ensemble profescionistich, che ó dí sponsors, reclam turistich y economia. Da dí él ince che les atletes y i atlec de Copa dal Monn se merita en cösc ann en aplaus emplü: ai se alenëia, fej gares, se sposta da en paisc y hotel al ater, con döt le prigo dal coronavirus co apaissa endlunch. Chapeau!
La gara dles ëres a Al Plan é em­por­tanta en previjiun dai Mondiai te Anpezo, co metará man te chinesc­dé zirca (ai 8 de forá 2021): dal punt de odüda de imaja (Dolomites) y por la cualificaziun dles atletes tal slalom lerch.
Do Cortina jará spo les atletes de Copa dal Monn dles disciplines asveltes (super g y discesa) dai 24 ai 28 de forá 2021 te Fascia, olache al sará söla pista »La Volata« de San Pelegrin döes gares. Por Fascia él le debut te Copa dal Monn, a gauja (por merit – pón dí!) dal »virus«, Fascia aspeta tront' agn a cösc mo­mont storich, en cösc iade con les atletes »prime­donne« zonza fans.  (de Iaco Rigo)