La Usc di Ladins

Dessënies n con’ dl’ëila
La Lia Mostra d’Ert nvieia ala mostra di chedri fac ntan l curs de dessëni cun Egon Rusina
La giaurida dla mostra ie ncuei vënderdi, 13 de jené dala 18:00 tla sala dl Circolo. I:la partezipan:tes dl curs de act cun Egon Rusina prejenterà na vela de dessënies y pitures che trata dl corp dl’ëila, uniun:a te si maniera, reprejentan l suget coche ël o ëila l veija y l sënt te chël mumënt. L ie da udëi ora sentimënc desfrënc, che se respidlea tla linia, tla vela dl culëur y tla tecnica. N puderà amiré lëures de Anna Iduna Bonell, Ottavia Demetz, Isaak Demetz, Sophie Eymond, Marta Kostner, Luca Mussner, Eric Perathoner, Damian Piazza, Ivo Piazza, Michela Piazza, Leonora Prugger, Hans Rabanser, Klaus Rungger y Valeria Stuflesser.
La mostra ie da udëi nchin ai 22 de jené, for da merdi nchin dumënia dala 17:00-19:00. De dumënia ie la mostra davierta nce danmesdi, dala 10:00-12:00.

Cunzert dl’Urchestra Haydn
I Jëuni de Mujiga Gherdëina nvieia al cunzert dl’urchestra Haydn: n juebia ai 19 de jené dala 20:00 tla Cësa di Cungresc a Urtijëi
A giaurì l cunzert saràl la ouverture dl’opra plu cunesciuda de Haydn, recunesciuda da d’ël nstës coche si miëura opra: Armida. La trama ie tëuta dal capolëur de Torquato Tasso, la »Gerusalemme Liberata«, ma te chësc pez ne n’iel nia l eroe Rinaldo tl zënter, ma si antagunista: la stria Armida.
L cunzert va inant cun Kodály cun i »Bai de Galanta«, che chërda adalerch la mujiga gitana scuteda su ntan si nfanzia tla zità slovaca.
Da dedò puderàn scuté su l’Otava Sinfonia de Beethoven.
La sëira fina via cun l segondo cunzert al tlavier de Šostakovič, cun Alexander Lonquich tla viesta dopla de solist y diretëur. Šostakovič à dedicà chësc pez a si mut Maxim, nce ël pianist, y l mët te n carater da fabula che à ispirà nce la Disney per n cronometraje te si capolëur »Fantasia 2000«.

Referat »Maië sann tla menopausa«
L KVW de Urtijëi/Runcadic

• 
•  

View the embedded image gallery online at:
https://www.lausc.it/manifestazions-y-evenc/22218-manifestazions-atuales-speziales#sigProId6c385eb35d

nvieia a n referat ai 18.01. dala 20:00 y a n workshop ai 25.01. dala 18:00 ti salamënc dla Nëus Jëuni Gherdëina a Urtijëi
Sintoms coche i ciauc, nia vester bones de durmì, mudazions de umor, possa unì smendrii maian spëisa adateda. Ntan l referat cun la duturëssa Ivonne Daurù, vëniel mustrà su la sustanzes che possa vester de utl. Da dedò cujineràn deberieda vel’ derzeda y puderà ciarcë spëisa che fej particularmënter bon te chësc tëmp. La cunferënza ie debant.
L’ena do, n mierculdi ai 25 de jené, saràl pona n workshop de 4 ëura, dala 18:00 inant, ulache l unirà cujinà spëisa che fej particular­mënter bon tla menopausa y l unirà nce maià deberieda. N se ancunterà tla cësadafuech dla Nëus Jëuni Gherdëina. Chi che fajerà pea giaperà nce na mapa cun la rezetes. N possa se nuté su tla Butëiga dl Mond a Urtijëi, dai 19 nchin ai 23.01. Da paië ite iel 48€: te chësc priesc iel nce la roba da maië y la rezetes. Da tò pea: gurmel, curtel y brëia da taië su.

»Ski Caching« a Urtijëi
La Scola de schi y snowboard de Urtijëi nvieia ala cumpetizion de Ski Caching, n sada ai 21 de jené
L se trata de na sort de ciacia al tesor sun i schi, ulache la va de jì a crì tofles sparpaniedes ora mpue sëura dut l raion da jì cun i schi de Gherdëina. N fej pea te scuadres da doi o de plu, y canche n ruva pra chësta tofles iel da se fé na foto, sun chëla che duc i:la partezi­panc:tes y la tofla muessa vester da udëi. Dan pie via giaperàn na cherta dl raion cun la lueges dla tofles. Te vel’ luegia saràl nce da ressolver juesc urganisei dala Escape Room Val Gardena.
N se anconta n sada ai 21.01. dala 08:30 sun Plaza Rezia dan l ufize dla Scola de Schi de Urtijëi per pië via dala 09:00 cun i schi y la cherta tla man. Dala 16:00 messeràn inò vester de reviers sun plaza. Premiei unirà nce chëi:les che publichea la fotografia sun Instagram cun #skicaching y #skischoolortisei.
L possa fé pea jënt de uni età (nce categuria familia). N possa se scrì ite tla Scola de Schi de Urtijëi nchin ai 18 de jené, tel. 0471 796153. L priesc ie de 35€ per scuadra. Fajëde pea, l sarà dessegur da se devertì!

Antermëia festejëia Sant Antone
En mertesc ai 17 de jená inviëia le Consëi de Cöra da Antermëia ala festa de Sant Antone abat, patron dla ciaussa y dla Dlijia d’Antermëia. Domisdé gran batadú
Sant Antone é a Antermëia na festa sintida, pro chëra che al röia alerch ince tröpa jënt da foradecá, cis paurs y famëis che vëgn a se perié jö l’aiüt dl Sant por podëi passé l’ann nü zënza desfortünes a porsones, tiers y cosses. En mertesc ai 17 de jená ésera indô tan inant. Le Consëi de Cöra inviëia ala festa, che mët man dales 9:00 cun la Corona te dlijia, y dales 9:30 sarál spo la santa mëssa da festa a onur de Sant Antone. Dedô vëgnel sorví val’ de cialt y düc ciafa n simbol dl Sant da taché söl guant. Por chi che ó, él la poscibilité da marné te salf dles manifestaziuns.
Domisdé vara inant te salf dales 14:00, olache al sará le batadú cun de bi pesć y ola dla fortüna. Les prenotaziuns al batadú vëgn tutes sö tres whatsapp al 338 6156637. Les entrades dla festa vá a bëgn dla dlijia.