La Usc di Ladins

Yoga tratan l’invern
Le Consëi de formaziun Badia mët a jí n curs cun Gabriel Prada, davert a düc – ëi y ëres
I sun düc unics y da situaziun a situaziun adorunse val’ d’ater por aumenté nosta energia. Le Consëi de formaziun Badia mët a jí ai 12, 19 y 27 de dezëmber, sciöche ince ai 2, 9, 16 y 23 de jená 2025 n curs de yoga tratan l’invern cun Gabriel Prada.
Dales 19:00: yoga da d’invern – 75 menüc
Le yoga é na disciplina nasciüda dan tröc milesc de agn tl’India. Sëgn él ince tres plü conesciü chiló da nos, giulan al benefize fisich y mental che al pó porté.
Dales 20.45: Animal Flow – 75 menüc
Stil ispiré dai movimënc di tiers che á elemënc dl yoga, dla ginastica y dles erts marziales. Le curs é por chi che ó ciafé forza, coordinaziun y mobilité.
Por informaziuns y prenotaziuns pón contaté Gabriel al 347 5877635.

Raiffeisen ITF Woman Val Gardena Südtirol
Nchin a n duman, sada, 7 de dezëmber jiràl inant – tl zënter dal tennis a Runcadic – l turnoi dl’ëiles Raiffeisen ITF Woman Val Gardena Südtirol
L turnoi dl’ëiles che à metù man ai 1. de dezëmber pieta inò n niveau scialdi aut a livel mundiel.
Ncuei, vënderdi ai 6 de dezëmber saràl la doi semifineles dl singul, la prima dala 11:00, la segonda riesc daldò. Dala 14:00 pona la finela dl dopl.
Duman, sada ai 7 de dezëmber dala 10:00 saràl la finela dl singul.
Cun plajëi nvieia l Tennis Club Urtijëi duc y dutes a unì a ti cialé ala partides. La ntredes ie debant.

»Cunties y paoi«
L Circolo – Lia Mostra d’Ert nvieia a na letura scenica te si self dla mostres a Urtijëi, ai 12 de dezëmber dala 20:00
L se trata de na letura scenica dl pez teatrel per badiot, ora dl liber de Mattia Maldonado, che durerà feter 90 menuc. L ie n monologh che unirà alesirà tres pitura dal vif y mujiga. Ntan la letura pruieterà Silvia Baccanti imajes sun parëi che vën depëntes al mumënt.
Danter­ite sunerà Marco Grigis (banjo), Giordan Crazzolara (chitara) y Philipp Schör­ghuber (contrabas).
La letura trata la luna y l surëdl, sentimënt y rejon, mitologia y paroles che mancia. L teater te trëi ac, che tol ite lijëndes de nosta valedes, chier y dà prupostes per inuemes de pavëi che ne ie nia dan man.

Prejentazions dl liber per pitli y granc
L Istitut Ladin Micurá de Rü à l plajëi de nvië a doi prejentazions dl liber nuef »Ujep y la stries mates«: la prima a S. Martin de Tor y la segonda a S. Cristina
L liber nuef de Maria Paola Asson, scrit te trëi lingac, unirà prejentà n vënderdi ai 13 de dezëmber dala 15:00 tl Istitut Ladin Micurá de Rü a San Martin de Tor. Sonia Ortlinghaus fajerà l acumpaniamënt musichel cun l’erpa.
N sada ai 14 de dezëmber dala 15:00 saràl la prejentazion tl Self dl teater de S. Cristina. Sonia Ortlinghaus sunerà l’erpa y l cianterà l Cor di Mutons de Sëlva. Granc y pitli ie de cuer nviei.

Conzert d’Advënt a Badia
En domënia ai 15.12. vëgnel pité te dlijia de Badia n conzert d’Advënt
En domënia ai 15 de dezëmber dales 17:00 él te dlijia de Badia n conzert d’Advënt, olache al sará da aldí le cor di jogn »Kyrios«, le cor dles ëres »Kerygma« y i Turmbläser de Badia. L’entrada é debann; na spënora de buna man é sambëgn bëgnodüda.

Santa Lizia a Lungiarü
En vëndres ai 13 de dezëmber vëgnel festejé a Lungiarü le patrozine de Santa Lizia. En chël de sarál ince n marcé da Nadé a bëgn dl cor de dlijia
La cöra da Lungiarü inviëia cun gran plajëi döta la comunité a fá para ala festa de Santa Lizia, patrona de nostra dlijia da Lungiarü, che vëgn invocada sciöche proteturia dla löm di edli y dla löm dla fede.
Tl bel tëmp d’Advënt toma ite la festa de Santa Lizia en vëndres ai 13 de dezëmber. La Ploania da Lungiarü festejëia chësta Santa cun gran veneraziun y solenité y se conforta da saludé düc chi che gnará a fá patrozine cun süa comunité.
Dales 8:30 él la corona y dales 9:00 la santa mëssa solëna; do mëssa vëgnel organisé tl salf dla scora n marcé da Nadé, organisé y a bëgn dl cor de dlijia. Lapró sarál val’ da bëre y da sgolosé, da pert dla Uniun dles ëres.