La Usc di Ladins

Soreie, bela neif e na organisazion ezelenta à caraterisà la doi garejèdes nazionèles de skicross endrezèdes dal Ski Team Fascia en vender ai 10 de jené sul portoi Monzoni sun Sèn Pelegrin che metea a la leta l Trofeo Dolomiti Energia.

Na bela sodesfazion te Fascia ence per i resultac arjonc dai atlec de val o che se arcedea e studia de gra al projet Ski College de la Scola de Fascia.

Sun duc l suzess maor l’é stat chel de Jannes Debertol, chiamà ence a fèr pèrt de la squadra nazionala per l freestyle ai YOG, i Jeghes Olimpics di Joegn da d’invern a Losanna te la Svizera.

Sun Sèn Pelegrin en vender passà l joen fascian del 2002 del Ski Team e del Ski College de Fascia se l’à jièda fora te duta doi la garejèdes con Filippo Zamboni, trentin da Campiglio, ruan al prum post dant dal compagn te la pruma garejèda e al secondo post sobito te dò te la seconda.

Bogn resultac ence per etres atlec del Ski College de Fascia: Alessio Gottardi da Moena e Alessio Barbieri se à baratà l 4° e l 5° post te la doi garejèdes e Tommaso Dellantonio se à piazà al 6° e al 7° post.

Per chel che vèrda la eles enveze bel resultat de Nathalie Bernard del Ski Team e Ski College de Fasscia. La joena da Ciampedel del 2003, che fèsc pèrt de la squadra del Comitat Trentin de skicross, la é ruèda al terzo post te duta doi la garejèdes, che à vedù al prum post Andrea Chesi e al 2° Rebecca Paoli.

 (lg)