La Usc di Ladins

Va inant anter auc e basc la sajon de slalom per i atlec ladins, e se anter i basc l’é da recordèr per prum l’enfortunie de Manfred Mölgg e i miores che ence te l’ultima garejèdes é suté, anter i auc tel fin de setemèna di 8 e 9 de firé l’é de segur la prestazons de Federico Liberatore da Mazin.

L slalomist fascian del ’95 en sabeda ai 8 a Chamonix, pean via col numer 56, l’é stat bon per la pruma outa de se califichèr ruan al 30° post e te la seconda pèrt de la gara l’à fat adertura l secondo mior temp de manche, recuperan coscì ben 19 posizions e ruan a la fin giusta fora da la Top Ten, con n beliscim 11° post a 1.31 dal venjidor Clement Noel e col resultat mior anter i taliegn

Desfortuné i compagnes de squadra: Alex Vinatzer l’é sutà jà te la pruma manche, desche Razzoli e Maurberger. Gran speranza e sodesfazion enveze, ampò con delujion finèla, per Stefano Gross, che peà via col numer 20 dò i resultac no ezelenc de la ultima garejèdes l’é stat bon te la pruma manche de fèr na gara da marevea ruan al 3° post, ma dapò te la seconda manche l’é sutà, desche n muie de etres anter i miores. Se spera che la grinta desmostrèda joe ampò al moral de l’atlet da Poza. 

Endèna podon se consolèr e condivider la gran sodesfazion de Liberatore, che dò se aer vadagnà ponts preziousc te la classifica de Copa del Mond, l dì dò l’à confermà sie moment de òr tel slalom de Copa Europa a Berchstesgaden. Tel Bayern l’atlet fascian de le Fiamme Oro se à dat batalia con Atle Lie McGrathe dò aer vent la pruma manche l’é stat bon de ge tegnir poz ence te la seconda, ruan al travert con 11 centeisemes de vantac sul norvegeis. Pecià per Tobias Kastlunger, 8° dò la pruma manche, che l’é jit fora te la seconda.

Per Liberatore chesta l’é stat la seconda venta e l 4° podie de Copa Europa, e ensema col bon ejit de Chamonix ades i numeres sul piet pel se arbassèr e la chances per concostèr de etres bogn resultac pel crescer. Ge l’auguron de cher.  (Lucia Gross)