La Usc di Ladins

Passa 250 concorenc à tout pèrt en vender sera a la 7^ Moena Ski Alp endrezèda da Fassa Events, seconda proa de schialpinism del Trofeo Ski Alp 4 valèdes. Chest an l percors é stat deldut mudà per via de la mencianza de neif e coscita i concorenc é jic su per l portoi Fiamme Oro II e Fun Slope pontan demez da Valbona a 1.830 metres de auteza per ruèr fin sa Le Cune a 2.200 metres. Apede a la gran partezipazion de atlec l’é stat ence na bela gara de sport e devertiment con la cena e la premiazions sobito dò al Chalet Valbona. 

Gran bel resultat di atlec di Bogn da Nia con la venta de Simone Manfroi che à serà sù la gara te 18 menuc e 37 seconc, sobito dò l’é ruà Thomas Trettel de la Cauriol col temp de 18:43 e al terzo post l’é n auter atlet di Bogn da Nia, Gabriele Depaul, col temp de 18:49.

Per chel che vèrda la eles enveze l prum post é stat arjont da Erica Turi del Dolomiti Ski Alp col temp de 24:03, secondo sciaier per Marta Vinante de l’US Cornacci col temp de 24:24 e terzo per Heidi Dapunt de Badia Sport, pruma de sia categorìa, che à corì l percors tel temp de 24:34. Quarto post per l’atleta de cèsa Carla Iellici enceben che l’aesse garejà con n fort mèl a la schena. 

L team Bogn da Nia à vent ence l pest del grop più numerous con 30 concorenc e dò chesta 2^ proa del Trofeo 4 valèdes l’é ence la pruma sozietà con 5.911 ponc, al 2° post l’é la Cauriol con 3.241 ponc e al terzo l Ski Alp Valdobbiadene con 2.338 ponc. A cef de la classifica provisoria del zircuit l’é Simone Manfroi e Erica Turi e per i joegn Federica Fietta e Nicola Boneccher del Ski Team Lagorai.

En vender ai 14 de firé l’é la terza proa del Trofeo 4 valèdes col 23° Memorial Maurizio Zagonel a Sèn Martin. I prumes concorenc ponta demez da les 19.30. La quarta proa sarà en vender ai 28 de firé col 25° Molino Caverson a Falcade.

Su La Usc stampèda de vender ai 14 de firé la classifiches con i miores ladins.  (mci)