La Usc di Ladins

Adriano Desilvestro l’é n joen da Poza, clasc 1996. Nicola Ganz l’é da Moena, el l’é del 1997. Ensema i é jic tel Canada, te la zità de Whistler. Aló i vif, i laora, i studia, ma soraldut i va co la brea, sia pascion più grana. Whistler l’é un di raions dai schi più gregn del Nord America, la longia sajon da d’invern la va da november a la metà del meis de jugn, l’é na destinazion turistica cognosciuda te dut l mond soraldut dai joegn. E proprio aló i à cernù de jir Adriano e Nicola. Noi i aon contaté e ge aon fat chesta intervista dopia.

Can siede jic tel Canada?
Adriano Desilvestro Son ruà tel Canada per la pruma outa de november del 2017 con l’idea de star chiò 6 meisc.
Nicola Ganz Giö son ruà d’uton del 2018, l’era ence de november.

Co éla che aede dezidù de jir aló?
Adriano É semper volù viajar e l far soraldut per mia pascion: la brea. I ultimes doi egn, canche ere amò a ciasa, l’é stat sajon n muie senestre per i impianc dai schi percheche l’era semper pecia neif naturala. Gio lurae al ‘snow park Carezza’ forin Mont de Vich e veder dut chel vert jà de jené per doi sajon a dò a dò, me à dat la spenta per dezider de me n jir. Al scomenz me pissae de jir te la California, a Mammoth Lakes, ma l’é n muie senester ciapar n visto de lurier per l’America e coscita é tacà a me enformar per l Canada. L Canada sporc n program chiamà working holiday che dasc n visto de lurier per 6 meisc e sobito dò n auter visto turistich per autres 6 meisc. Coscita é tacà a vardar i posć olache me aessa sapù bel jir e apenamai che é vedù coche l’era Whistler no é più abù dubies. É tacà a manar duc i documenc che l’era de besegn e canche mie visto l’é stat aproà, é prenotà n sgol e son partì.
Nicola É dezidù de vegnir tel Canada per desvalive rejon, ma segur chela più grana l’é mia pascion per la brea. Mie ensomech più gran fosse stat chel de jir te la California, a Bear Mountain, ma per noi taliegn, descheche à dit Adriano, l’é n mulge senester o beleche empossibol aer n visto de laor ti USA. Son semper stat trop amich de Adriano e canche è sapù che el l’era jit tel Canada me è empensà de jir ence giö, la stagion dapò. Me è empensà de vegnir chigiò no demò per la brea o per vegnir a troar Adriano, ma ence per miorar mie lengaz ingleis, far növe amicizie, me averjer a növe strade e növe oportunità.

Donca, me sà de aer entenù che voscia pascion più grana l’é la brea…
Adriano Ei, ben segur, jà da canche aee 8 egn. Me recorde che mia mare me à portà sun Bufaure, su da Cuz, l’era la fin de la sajon, i seraa i impianc e i aea fat sù n saut per i bec che jia co la brea. Ló me é enamorà… de la brea!
Nicola La brea per me l’é zeche de più che na pascion, l’é n stil de vita, na familia!

L fajede demò per pascion o ence per mestier?
Adriano É proà a l far doventar n mestier jà canche lurae al snow park forin Mont de Vich ma enlouta me é rendù cont che preferesce tegnir lurier e pascion spartii per l moment percheche fin canche me tegn i jeneies voi jir con la brea demò per me enstes. 
Nicola Per endana l fae demò per pascion. Voi dir che no me vadagne da viver con la brea, ma ben segur l’é chel che volesse te mia vita.

De più su la vita, l lurier e la pascion de Adriano e Nicola su La Usc stampèda de en vender ai 28 de mé del 2021.  (Monica Cigolla)