Georg Piazza venc la Dolomyths Run Ultra Trail

Data

17 de messel 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’atlet de Gherdena à dominà per la terza outa la garejèda ladina, mioran l record del percors, jit per la pruma outa sot la 6 ores. Luca Pescollderungg secondo te la Half Trail.

La Ultra Trail l’é la garejèda de Georg Piazza. Dò aer vent la edizions del 2014 e del 2016, l’atlet de Gherdena l’é stat l mior ence chest an, e l’à ence segnà l record de la competizion col temp de 5h58”54. Na prestazion straordenèra, che per la pruma outa sul percors de 61,2 chilometres con 3378 metres de dislivel à fat fermèr l temp sot la 6 ores, mioran l primat adertura de 35 menuc e 41 seconc.

L’atlet di Gherdëina Runners-La Sportiva l’é ruà prum ence al “sprint Felix“ de Selva, dò 17 kilometres, travert metù per recordèr Felix Mussner.

Te la Half Trail de 33 chilometres con 2000 metres de dislivel enveze la garejèda à vedù a cef, a dò a dò ensema per dut l percors, Andrea Pozzer e Luca Pescollderungg. A la fin Pozzer l’é stat bon de aer la venta con 2 menuc de vantac, ampò l badiot se à vadagnà n bel secondo post.

Doman l gran event de corsa sa mont se sera sù con la terza garejèda, la Skyrace, che pea via da les 8.30 da Cianacei per ruèr endò tel medemo paìsc fascian dò 22 chilometres, 10 en su e 12 en ju, con n dislivel positif de 1750 metres.

A proèr a bater l record de Kilian Jornet sarà ence Davide Magnini, jà venjidor en vender de la pruma de la trei garejèdes, la Vertical de Crepa Neigra.

La Skyrace de doman sarà da poder veder en direta streaming su la piata Facebook dolomythsrun e goldentrailseries.


De più su la garejèdes de la Dolomyths Run sarà da poder lejer su La Usc stampède de vender ai 24 de messèl.

 (Lucia Gross)