La Usc di Ladins

En domënia ai 25 de setëmber él gnü metü a jí l’ultim torné de golf sön le ciamp Tranrüs da Corvara, le »Trá l'Putt«, na iniziativa dl’uniun di Jogn da Calfosch-Corvara, en colaboraziun cun le Golf Club Alta Badia. Al é n torné n pü' atramanter da düc i atri, che vëgn soghé a copies y che ne inviëia nia ma adalerch sogadus de golf, mo ince prinzipianc. I trates da dalunc vëgn fates dal golfist, canche an röia spo sön le “green” (incër la büja ia) y al é da “trá l'putt” ti tochera al prinzipiant. Ince en chësc ann é la partezipaziun stada bona y le Golf Club á podü stlü ia la sajun, ti daurin les portes y apascionan sogadus nüs por la proscima sajun.

Les classifiches
Lordo: 1. Claudio Tiezza cun Serena Trottner 51 trates., Netto: 1. Hannes Zingerle cun Matilde Pedroncelli 30 trates, 2. Nicoló Camurri cun Marco Cosentino 36 trates.
Le miú prinzipiant da “Trá l'putt” é stada Matilde Pedroncelli cun 20 trates.

I golfisć dl’Alta Badia se arjigna ca por l’ultima desfida: en vëndres ai 7 de otober él sön le program le torné sozial, che gnará metü a jí sön n ciamp daldüt nü, le ciamp de Villa Condulmer a Mogliano Veneto.  (md)