La Usc di Ladins

In doa setemanes ‘l é ruà doi scudete taliane de curling de ra femenes, in Anpezo. Domegna ai 10 de otobre ‘l é ruà chel Juniores, co ra scuadra del club Dolomiti, fata da Marta Lo Deserto, ra doa soreles Federica e Francesca Ghedina e Erica Siorpaes, alenades da Michele Gusella e Fabio Alverà. Chesta tośates ‘s à vento contra cheres del club Lago Santo da Cembra, in Trentin. Ai 26 de setenbre ‘l ea beleche ru el scudeto talian 2021 Seniores, senpre par el club Dolomiti Disano, co ra atletes Stefania Constantini, Denise Fundone, Lorenza Piccin, Katia Sottsass e Giulia Zardini Lacedelli, alenades da Alessandro Zisa, che ‘l é el presidente de chera sozietà de sport. Ades alcuantes de eres ‘s à da se parecià polito, parcé che ‘l é ra Olimpiades in Cina, ca de poche mesc.