Si eies sgalizea de na lum rara e l’esprescion del vis l’é chela de la contenteza. No serf tante de parole per entener la pascion che l’à tel cher, Samuel Pellegrin da Soraga, clas 2001. L’é chela per l balet classich, na pascion nasciuda jà da canche l’era pìcol e l jìa amò a la scola popolara, che dapò la é cresciuda tel temp e l’à ciapà forza.
Cognosce Samuel da la scolina e posse testimoniar che l balet classich l’é semper stat so pensier fis. L volea doventar balarin e n balarin l’é doventà. La strada é stata longia e ria percheche l’à cognù jir jà da pìcol fora de ciasa e se usar a star te n’autra familia. E far sacrifizies, per chel che varda le amicizie, le feste, l leam co la comunanza.
No l’é stat sorì per n tous dal carater spavech desche Samuel, ma la determinazion a arjonjer sie obietives l’é stat la spenta per jir sorafora ogne moment rie. E n’é stat, momenc canche chi eies che ades spriza lum se à empienì de lagreme.
Aon scontrà Samuel te vidor de sie hotel a Soraga e l’é stat desche veder n film a velozità dopia, cinch egn passé te n sgol da canche proprio sun chest sfoi dajaane la bela neva che l’era stat ametù a la Tanz Akademie de Zurigo. E ades l’é ruà l diplom.
Ma chesta no l’é la soula bela neva. Con doman, col prum de aost, Samuel ponta demez per Tallin olache l va a far part de l’Estonia National Ballet.
Ma tiron endò la pelicola e se fajon contar da Samuel coche la é jita.
Podede troèr l'intervista entrìa su La Usc 30 de vender ai 31 de messèl (Monica Cigolla)
Samuel, n balarin fascian te l’Estonia National Ballet
Se concretisea pian pian l’ensomech del joen da Soraga che con forza e determinazion l se à diplomà a la Tanz Akademie de Zurigo
Galaria retrac
View the embedded image gallery online at:
https://www.lausc.it/valedes-ladines/fascia/13173-samuel-n-balarin-fascian-te-l-estonia-national-ballet#sigProIdaae69f6c41
https://www.lausc.it/valedes-ladines/fascia/13173-samuel-n-balarin-fascian-te-l-estonia-national-ballet#sigProIdaae69f6c41