La Usc di Ladins

L’é te ospedèl a Trent en condizions grieves Federico Costantino, de 40 egn, gestor de “L Resolé” ta Dèlba, che en vender ai 9 de jené inant mesdì, endèna che l vegnìa ju de Contrin, a na auteza de presciapech 1700 metres l’à perdù l control di schi e l’é sutà jù con n saut de n bon pec de metres, ruan te anter i èlbres. Bon che n om à vedù l’azident e l’à chiamà sobito l 112, l’era entorn 20 a les doudesc, se no olache Costantino é sutà jù fossa stat dassen senester che zachei posse l veder.

Sie omegn del Socors da mont Auta Fascia, col capostazion Stefano Coter, i é ponté demez sobito con l quad che giusta acà n an la stazion de socors de Cianacei l’à podù se proveder, e te 10 menuc i é rué sul post per portèr l prum didament a Costantino, che endèna l’aea perdù cognoscenza. L’era passa 15 degrees de freit e, apede a la ferides, l gran pericol l’era ence che la temperatura del corp se arbasse massa.

Dò mingol l’é ruà ence l jolier che co la binda l’à calà jù i sanitères. L’om é stat rianimà e stabilisà, portà con la binda sul jolier e menà coran a l’ospedèl de Trent, olache l’é stat portà en rianimazion.  (lg)