La Usc di Ladins

Soscedèr l debatit e smaorèr la cognoscenza. Con chisc obietives la Neva UAL à endrezà na lingia de momenc informatives en streaming sul tem de la mobilità te Fascia. En mercol ai 7 de oril l’é stat l prum apuntament con l relator Mauro Gilmozzi, jà assessor a l’urbanistica, enc locai, personal, lurieres publics e viabilità de la Provinzia de Trent che endèna sie mandat à fat aproèr la lege provinzièla 6/2017 su la pianificazion e gestion di intervenc en materia de mobilità sostegnibola.

La scontrèda é stat averta da Cristina Donei e Martina Pederiva de la Neva UAL che à metù dant i entendimenc de chesta scontrèdes, apontin chi de tor dant duta la prospetives projetuèles sun desch per no se serèr nesciun usc.

Mauro Gilmozzi, dò aer fat n chèder de l’evoluzion di mesi de trasport dal XIX al XXI secol, l’à metù al luster i obietives de la Provinzia de Trent che con la lege provinzièla nr 6 del 2017 la vèrda a na mobilità sostegnibola entenuda desche sistem integrà e multimodal che permete de smendrèr la dependenza da l’elech minerèl e da la materies prumes che no é renovaboles, zenza sacrifichèr l’efizenza e l derit a la mobilità. Per arjonjer chisc obietives la se met dant soraldut de smaorèr l trasport publich per ruèr dant del 2030 al 60% de jent che se mef coi mesi publics e demò l 40% con l’auto privat.

»Ti ultimes egn l’é stat envià via n muie de studies e projec per ruèr a troèr fora la soluzions miores de mobilità sui teritories de la valèdes de la Veisc – à dit Gilmozzi – e de coleament con la arees dintornvia. L projet del Bus Rapid Transit l’é l prum vèrech de n prozes che perveit la realisazion de la circonvalazions programèdes tel Pian Stralcio de Fascia e la evoluzion del medemo BRT te na metrotramvia.«

Gilmozzi à spiegà che l projet del BRT, che fossa creèr corsìes dedichès a la corieres (olache l’é l met de l fèr dinlongia l stradon, autramenter vegn metù jù i semafores che lasce passèr inant i mesi publics) no é en contast con la ferata e nience con la circonvalazions. L’é l pont de partenza per mudèr la mentalità de la jent che cognessa se usèr a lascèr l’auto a cèsa e se mever de più coi mesi publics, descheche per auter vegn jà fat te n muie de paijes de l’Europa. »L BRT amò apede – à dit Gilmozzi - l’é n projet zenz’auter manco da impat che l’autra soluzions metudes sun desch, l consentissa n sacrifize mender de teritorie e l costassa n muie de manco.«

La jent à dit la sia travers la chat de Facebook e de YouTube, n muie i comenc de contra al projet del BRT, che creassa amò più coudes de auti, con entesseament maor e soraldut percheche te Fascia no l’é post daperdut per fèr la corsìa preferenzièla e donca chesta soluzion portassa ben pec vantajes.

BRT, ferates, circonvalazions, coleamenc a fun: la discuscion va inant e la scontrèdes de la Neva UAL ence.

De più sun chest argoment su La Usc stampèda de en vender ai 16 de oril.        

 (mci)