La Usc di Ladins

La roba più emportanta l é che vegne arjont l quorum. L l aea dit bel chiar Claudio Bernard, en vender sera ai 17 de setember, canche con duc i componenc del Comitat jit fora e con i neves candidac l aea chiamà ite i capifech de Pera te Caserma di Studafech de Vac per ge portar dant mingol de bilanz de l’atività fata ti egn passé e i lurieres che à besegn de vegnir fac, ma soraldut per i enviar a jir a litar, en domenia ai 19, ajache de jugn no l era stat arjont l quorum.

Ti ultimes meisc l Comitat à podù far demò la aministrazion normala, zenza poder deliberar percheche l aea fenì so mandat – aea dit Bernard, capofrazion per 4 mandac da beleche 20 egn – ades l é lurieres che se cogn far en prescia e l é emportant che duc i capifech vae a litar, perché Pera no pel se permeter de restar amò ceta, fossa n gran dan per duta la comunanza.

En domenia ai 19 l quorum (che per Pera, aldò de so Statut l é del 50% de chi che à derit, e no del 30% descheche l é te le autre ASUC de Fascia) l é stat arjont. L é stat passà via l 60%, ampò Claudio Bernard no l é più ruà ite, prum di no lité con 42 stime, una de manco respet ai doi rué ite.

I capifech de Pera à scutà l apel a jir a litar, ma no chel a meter ence l sorainom de ciasa, e coscì na bona ventina de stime con scrit demò Claudio Bernard zenza »de Tito de Nato« à cognù vegnir anulade per omonimia, ajache l regolament de le litazion de le Frazion no l perveit, desche te le autre aministrative, de coscidrar l’intenzion del litant ence canche, desche te chest cajo, fossa stat pec dubies.

I inomes di candidac e di componenc del nef Comitat é da poder lejer su La Usc stampèda de vender ai 24 de setember.  (Lucia Gross)