La Usc di Ladins

Consei de Comun amò zenza l publich ma manà fora en streaming chel chiamà ite en mèrtesc ai 5 de otober a Moena. N Consei che à vedù endodanef la prejenza del conseier de mendranza Riccardo Franceschetti ajache l recors prejentà dal medemo conseier contra la dezijion de la maoranza de Comun per sia incompatibilità per steores no paèdes ti egn, ge à dat rejon e donca la delibera à cognù vegnir anulèda. La sentenza del giudize Massimo Morandini à stabelì defat che Franceschetti à l derit de restèr te Consei enscin ai 31 de dezember del 2021 e endèna portèr dant na neva domana de rateisazion per paèr sia debites. Do da chela data cognarà vegnir fat na neva valutazion dal Comun aldò de la situazion del moment, vardan se la debita é stata paèda o se l conseier à ativà na neva rateisazion.

L ombolt Alberto Kostner à dit che l fat é cognosciù e l à spiegà che no l é stat nia de personal e nience de politich te la dezijion de la maoranza ti confronc de Franceschetti. »Le sentenze se le azeta – à dit Kostner – e no se le met en discuscion. Noi aon respetà l regolament de Comun e chel che aon fat l é stat percheche ne saea la roba più giusta da far te chel moment.« 

La conseiera de mendranza Manuela De Pellegrini à dit che l grop fossa se n jit fora e no l aessa lità.

L Consei à dapò tout dant la mozion prejentèda dal grop de mendranza sui lurieres per meter en segureza la ferata Bepi Zach. 

De più su La Usc stampèda de vender ai 15 de otober.  (Monica Cigolla)