La Usc di Ladins

Tel teater del Oratorie de Moena en ocajion de la Festa del Rengraziament i studenc à metù fora i prodoc de la desvaliva ativitèdes e projec porté inant te chisc egn te la Scola Ladina de Fascia, dajan l met de veder cotant che noscia scola sie viva e feruscola.

Te na bela gran esposizion se podea veder i lurieres realisé l an passà dai studenc de la 4^ clas del Liceo artistich, con i bie dessegnes del figuratif e i modelins di projec che, à deschiarì i studenc, é stac pissé per fornir i spazies che tel frabicat a Sèn Jan é stac destiné a la scola populères de Poza.

Sul desche dedicà a la scienzes se à podù aer n muie de informazions su la torbiera de Roncon, n biotop sul tegnir de Vich, per jir forin Mont, e ence del studie fat dai scolees en cont di louves. I studenc à ence moscià l funzionament de la fototenetes e i retrac coi louves touc ju da chisc aparac.

Vejin l era ence l desch de la robotica, con i video che moscèa i bie resultac de chest percors.

N’autra esposizion era dedichèda al projet giornalistich, che ti egn à oramai portà a la produzion de 8 numeres de la bela revista »Filoreflex«, che tol dant ogne outa n tem particolèr per l dejoujer sot duc si desvalives aspec, da chi più gustegoi a chi più problematics, con reflescions n muie fones.

No mencèa i studenc che testimonièa, con materièi e paroles, l gran percors fat da la Scola de Fascia tel setor linguistich, didà ence da la partezipazion di studenc al an a la foresta.

En ultima, ma no de segur per emportanza, l era l desch del Olfed, l Ofize Ladin de Formazion e Enrescida Didatica, che se cruzia anter l auter de la produzion de duc i libres per l ensegnament per ladin de la desvaliva disciplines.

De più su La Usc stampèda de vender ai 15 de otober.  (Lucia Gross)