La Usc di Ladins

Fora per anter la nigoles se à fat veder ence n rai de soreie per l’inaugurazion de la neva Comunità alberch »N bel Soreje« te la senta de l’Anffas a Sèn Jan.

En mèrtesc ai 31 de mé l é stat l moment ofizièl con i utenc, sia families, i raprejentanc de Fascia e del Trentin del setor sozièl e l’autoritèdes. N moment sperlongià per via del Covid, ajache tel ultim partiment de la ex caserma Piave de Vich i utenc é jà ite da n trat, ma che enstadì é stat endrezà proprio per fèr festa duc ensema.

Dantfora l é stat l intervent de l’autoritèdes. L conseier provinzièl Gianluca Cavada à portà l salut da man del conseier ladin Luca Guglielmi e de l’assessora a la sanità Stefania Segnana che no à podù esser prejenc e l’assessora al sozièl de Comun de Sèn Jan Lucia Dellagiacoma à uzà fora la vejinanza de l’Aministrazion de Comun ai utenc e sia families. Luciano Enderle, president de Anffas Trentino, à recordà canche l é stat avert la pruma senta a Poza, inaugurèda ai 16 de mèrz del 1992, e l à metù al luster l’emportanza de aer chisc spazies percheche la persones con pedimenc posse se destachèr per n trat de temp da la familia e aer si momenc de indipendenza. »Tedò a Anffas l é la pascion e la volontà de gran femenes – l à dit l president Enderle – del 1965 l é nasciù la sezion trentina de gra a n grop de femenes e ence chiò te Fascia l é stat per merit de trei femenes.« Belapontin una de chesta trei femenes é states premièdes dal president Enderle con la resa bruna, l simbol de Anffas: Carmen Furci che à ciapà n fort batiman da man de duc.

La storia de coche l é nasciù l’Anffas te Fascia é stata recordèda da la conseiera de procura al sozièl del Comun General de Fascia Mirella Florian che à rejonà con gran cher e sentiment.
N fort rengraziament dal cher é jit dapò a Nives Pederiva, fia de Elvira, che à tout su l testamonech de sia mère e la é responsabola di familières. Ela à endrezà l moment de inaugurazion ofizièla e no l’à sconet la gran emozion per chest travert emportant.

De più su La Usc stampèda de en vender ai 10 de jugn del 2022.


 (Monica Cigolla)