La Usc di Ladins

De spes, te chest ultim temp, se rejona de mobilità sostegnibola, na mobilità che vèrde semper de più a la calità del teritorie e de la vita per sentadins e ghesć.

Él possibol rejonèr de mobilità sostegnibola ence te lesc a vocazion turistica dalonc dai gregn zentres olache la maor pèrt de la jent per se mever doura amò l auto privat?

Sun chisc argomenc, sui problemes e su la soluzions se à enterogà enstadì i reladores del enconter publich endrezà te Comun de Sèn Jan.

D’aisciuda del 2022 l é stat metù su n grop de lurier su la mobilità te Fascia con ite l Comun de Sèn Jan, l’Apt, i impiantisć, i taxisć e Transdolomites con chela de valutèr e miorèr l servije de pulmins del Comun de Sèn Jan.

Se trata de n servije projetà del 2012 e concretisà del 2019 canche l’Aministrazion de Comun à dezidù de serèr fora ai auti Gardecia e la val de Sèn Nicolò e de meter su picoi pulmins che porta inant e endò la jent. L servije dapò l é stat slarià fora sun dut l tegnir, da Moncion, a Meida e Tamion.

Dò l salut del ombolt de Sèn Jan Giulio Florian, l procurador del Comun General Bepe Detomas e l president de l’Apt de Fascia Fausto Lorenz à rejonà de na costion, chela del trafich, che no é stata touta en conscidrazion assà tel passà. »Cognon tacar a rejonar de cultura del trasport publich - à dit Detomas - sion jà tardives«.

De più su La Usc stampèda de vender ai 24 de jugn.  (Monica Cigolla)