La Usc di Ladins

Ence chest an n grop de bec con desturbes de autism à podù se passèr dotrei dis sa mont anter jeghes, raides e momenc de condivijion. Dut chest de gra a la Sociazion Bambi e la Coprativa sozièla Spazio Tempo che à endrezà la terza edizion de Alpine Butterfly, n projet che se cruzia de ge fèr troèr a chisc bec e sia families l ambient adatà a si besegnes. 

De gra a na rei de sostegnidores de Fascia e foravia, l Pavel da Mont à portà sun sia ales 8 families con 9 bec autistics per passèr na setemèna da ensomech forin Mont da Vich al MyTime Hotel Savoy. Dai 2 ai 9 de setember chisc bec e sia families é stac secodii con momenc speziai, fac de relazion, afet e benstèr: musicoterapia, Pet Terapy, raides sul teritorie, rampinèda, Karate, i é jic a nodèr e i à passà de bie momenc duc ensema de gra al didament e al suport de educatores en raport de 1 a 1, ascorc a ogne sie besegn.

Tel medemo moment la families à podù se goder si momenc ledesc, dedichèr temp e spazie a la creazion de rees che pel se mudèr te amicizies segnificatives ma soraldut de suport anter persones che vif ogne dì l autism. 

De più su La Usc stampèda de vender ai 29 de setember.  (MCI)