La Usc di Ladins

L é ai 8 de november, entorn les set da sera via: sona la seletiva di pompieres de Mazin e vegn chiamà na ambulanza de la Crousc Biencia de Cianacei da la Zentrèla del 112. A Ciampestrin, apede la stala Depaul, lo che l é na gran assa de bores, zeche l é jit de travers endèna che n camion fajea vèlch manovra. Trei persones les é states toutes ite te n azident, restan sot la bores.

Ma no ve cruzià! No l é sozedù nia de grief o senoauter de reèl, dalajà che l era dut na ejercitazion, pissèda dai istrutores de la Crousc Biencia e dal comandant di Studafech de Mazin Silvano Bernard.
Belimpont, trei persones é restèdes sot a zeche bores: desche se sozedessa te la realtà, la Zentrèla Unica de la Emergenzes del 112 à alertà la Crousc Biencia e l comandant di Studafech à manà fora la seletiva, acioche ic i metesse en segureza l post, descheche perveit i protocoi de intervent. Dut cant, donca, dal scomenz en ca l é stat fat desche se fossa n intervent reèl.
Per i studafech l é stat n intervent piutost senester a livel tecnich, dalajà che estra chest, i à cognù se cruzièr soraldut de fissèr la bores. I socoridores ge é stac do enveze ai pazienc, i valutan e, se fajan didèr dai pompieres, i li à trac fora da sot la bores. L é stat colaborazion e confront do e do anter la persones entervegnudes: tedant, desche zil, tant l ben e la sanità de la persones toutes ite tel azident, ma ence mantegnir semper la segureza di socoridores.

De più su La Usc stampèda de en vender ai 17 de november del 2023


 (Nicoletta Riz)