La Federazion Nternaziunela de Schi FIS à l’ena passeda fat ora l calënder dla sajon dla garejedes de Copa dl Mond de schi alpin 2020-2021. La senteda ie per l prim iede unida fata tres videocunferënza, pervia dl coronavirus. Tlo iel nce unì fat ora canche l sarà la doi garejedes de Gherdëina: l superG sarà n vënderdi ai 18 de dezëmber, n sada ai 19 de dezëmber saràl la libra tlassica. L se trata dla 53ejima edizion de garejedes sun l purtoi Saslonch. L training per la libra sarà n mierculdi y juebia ai 16 y 17 de dezëmber.
»La va de vester flescibli«
View the embedded image gallery online at:
https://www.lausc.it/valedes-ladines/gherdeina/12780-gherdeina-garejedes-de-copa-dl-mond-ufizieles#sigProIda61910fa8a
https://www.lausc.it/valedes-ladines/gherdeina/12780-gherdeina-garejedes-de-copa-dl-mond-ufizieles#sigProIda61910fa8a
»L ie uni ann na gran sudesfazion, canche l vën dat pro i terminns da pert di respunsabli dla FIS. Bele l ann passà, canche l fova unì programà definitivamënter la sajon agonistica, òven bele dat na previjion per l’autra sajons da d’inviern: la doi garejedes de jì debota de Gherdëina ie nscila seguredes nchin ala sajon 2022-2023. Chësc nes dà a nëus coche urganisadëures, ma nce a nosc cunlauradëures y a nosc partners, segurëza per la planificazion,« da coche auza ora l presidënt dl Cumité de Copa dl Mond de Gherdëina Rainer Senoner, che sotrissea che »pervia dla situazion de coronavirus jiràla de vester scialdi flescibli tla proscima sajon, da pert di urganisadëures de garejedes de Copa dl Mond, nce te Gherdëina. Coche bele auzà ora pra plu ntervistes ons bele fat cont cun plu szenares. Tl miëur cajo pudons fé la doi garejedes sciche zënza, cun publich. Ma son nce njeniei a mëter a jì garejedes cun manco publich, monce cun degun publich. Cialon inant cun otimism.« Bele tl scumenciamënt de dezëmber saràl coche da tradizion la garejedes per i jëuni, pra la FIS Challenge da Piz Sela ju.
David Lardschneider
FOTO: Dominik Paris ntan l training te Gherdëina ai 19 de dezëmber dl 2019.
