La Usc di Ladins

»Fitness« é na parora ingleja che vëgn dal agetif »fit«, che ó dí adaté, adegué. Tl lingaz da vignide vëgn chësta parora adorada por definí na buna condiziun fisica, tanco n corp sann y che se stá bëgn. Cun fitness vëgnel ince definí dötes les ativités de movimënt, che porta pro a na buna condiziun dl corp, che n'é indere nia ma fisica, mo ince mentala. La Uniun Sport La Ila é partida sö te trëi seziuns: al é la seziun volley, la seziun telemark y la seziun fitness. A ce dla seziun fitness él Thomas Valentini, che vëgn daidé da dui coordinadus, Lorenz Clara y Davide Moling. Ai s'á dagnora tut dant da organisé cursc de ginastica y movimënt, mo tratan la pandemia ái messü se archité. La poscibilité da se abiné ê gnüda limitada y por frecuenté les palestres orôl ester tesć, variores y zertificaziuns. Por passa dui agn ne éra insciö nia jüda da organisé valch, mo en chësc ann esi piá ia cun n proiet nü, che tol ite pici y gragn y che é gnü batié cun l'inom de »Fitnesslandia«. »I un scomencé da ponsé a chësc proiet en chësc ann de messé. Fitnesslandia é por nos sciöche na sort de parch di devertimënc, olache vignun pó chirí fora ci che ti plej le plü. I un cherié na oferta de cursc che se adatëia adüc, a pici, a gragn y ince a jënt plü de tëmp«, spliga Thomas. Chisc dis é bele pié ia le curs de yoga cun Gabriel Prada. Insciö ne vëgn i cursc nia tignis dai organisadus instësc, che á chirí istruturs por vigni ativité, dla Val Badia, mo ince da foradecá: »Nosc obietif é chël da pité de vigni sort de ativités por dötes les etés y sambëgn ne sciafiunse nos nia ince da insigné, porchël unse chirí adöm alenadus esperc. I cursc da balé unse p.ej. metü da jí en colaboraziun cun la scora de balé 'Shabba Crew' da Bornech. Impede mené fora nüsc mituns y nostes mitans, unse damane sce ai gnô ite«, dij inant Thomas.

Deplü podëise lí tla ediziun stampada da indoman, vëndres ai 16 de setëmber.   (kp)