Ai 20 de aurí, en ocajiun dla assemble generala, gnaral lité le consëi de aministraziun nü dla Cooperativa Turistica Alta Badia. Ara se trata dles prömes lites da canche les assoziaziuns turistiches é gnüdes metüdes adöm
Al é passé trëi agn dala fujiun dles trëi assoziaziuns turistiches dl’Alta Badia, che s’á metü adöm dl 2020 y che é dl 2022 deventades na Cooperativa. Le pröm consëi de aministraziun ne ê nia gnü lité, deache al ê gnü metü adöm dai consëis dles trëi assoziaziuns che ê bele. Porchël sará chëres che gnará a s’al dé ai 20 d’aurí, en ocajiun dla assemblea generala, les prömes lites dla Cooperativa Turistica Alta Badia. Le regolamënt dles lites é gnü aprové dai assoziá de novëmber, en ocajiun dla reuniun da d’altonn. Aladô dl statut saral deplü regoles che messará gní tignides ite, sciöche en particolar chëra dla rapresentanza, chël ó dí che i
mëmbri messará fá pert de düc trëi i comuns: 6 mëmbri messará ester dl comun da Corvara, 6 dl comun da Badia y 2 dl comun da La Val. Indöt é le consëi metü adöm da 15 porsones, porchël gnaral ciamó tut sö – cun dërt de lita–un di trëi ombolc. Ai podará fá fora instësc, danter ëi, che che nen fajará pert. I atri dui gnará dagnora inviá ales sentades, mo ne ará nia le dërt da lité.
Düc é inviá a se presenté »Do da trëi agn dala fujiun él gnü le momënt da lité le consëi y nos inviun düc chi che á interes da se mëte a desposiziun. Dantadöt jogn, jones y ëres dess se fá inant«, dij le diretur dla CTAB Max Nagler, che spliga inant: »Fá pert dl Cda dla Cooperativa n’é nia tan n gran impëgn. Ara se trata da tó pert a 7 o 8 reuniuns al ann, por chëres che al é preodü n paiamënt de 100,00 euro, sciöche fat fora tratan l’ultima assemblea. Düc chi che oress fá pert de nosta scuadra dess se lascé adintëne pro me o ince ti ofizi turistics.«
Deplü podëise lí tla ediziun stampada de nosc foliet, che vëgn fora incö, vëndres ai 10 de merz. (kp)
