La Pli: en pü’ en n’ater calënder dai Stödafüs

Data

20 de dezember 2023

Galaria retrac

Grandeza scritura

Social

I Stödafüs d’La Pli á albü eniann na iniziativa particolara: chëra da lascé abelí le calënder dla uniun con dessëns y scric de scolari y scolares dla elementara. Garaté él propio val’ de bel

Śën ch’i jun adencuntra ala fin dal ann, él trec grups de Stödafüs co se mët sön tru fora por les ciases, por jí a partí fora i calëndri dla uniun y trá ete ensciö val’ bona spënora por sostegní söa ativité de valüta. Ensciö ésera ince a La Pli de Mareo, olache la jont podará eniann se conforté a en calënder en pü’ atramonter: lassora ne ciafun nia fotografies de proes, intervonc y mascins, mo na dërta cumpëda de scric y dessëns, co é gnüs fac aposta dai scolari dla elementara. Da tigní tla man le calënder él en plajëi y da ti ciaré ciafun la bona löna.
Sce döt cösc é garaté, él merit dla bona colaboraziun che i Stödafüs dal paisc á albü con la Scora. L’iniziativa á albü le stödafü Erich Palfrader, co á ciafé sostën te scora dales maestres Katrin Clara y Ulrika Pedevilla. I mënsc dal calënder é abelis con de bi dessëns da corú y creativité, deperpo che sora ca ciafun de vigne sort de ponsiers scric che i mituns s’á fat. Ponsiers co é gnüs lascés desche ai i á scric.

De cösc calënder ciafëise deplü t’La Usc di Ladins dai 22 de dezëmber, olache Erich Palfrader nes cunta co che la idea é nasciüda y olache i podëis ince odëi i pici gran artisć co á fat empara. (pablo)