La Usc di Ladins

Ai 27 de jená á l’uniun di Stödafüch da Lungiarü tigní süa sentada generala. Do le salüt da pert dl comandant Roman Clara él gnü tigní n menüt de chît, en onur di mëmbri dla uniun che é passá a miú vita. En particolar él gnü recordé le mëmber d’onur Albert Daverda, che nes á lascé tl ultim ann. Albert é sté bëgn 24 agn secreter (dal 1986 al 2010) y mëmber atif dal 1986 al 2001.
Tratan la sentada él ince gnü surandé deplü onoranzes: a Roman Rungger por 25 agn de sorvisc, a Elias Aichner, Michael Chiusura, Philip Moling, Mirco Schanung y Emil Sorá por 15 agn de sorvisc y a Richard Moling por 37 agn de sorvisc. Ai mëmbri dl grup jonil Fabian Clara y Nicola Pellegrini ti él gnü surandé na onoranza por avëi arjunt le plazamënt d’or pro le test de savëi. En chësta ocajiun á Nadine Sorá, Valentina Mischí y Christian Schanung dé joramënt y é passá insciö dal grup jonil a mëmbri atifs.

Deplü sön la sentada generala di stödafüch, sön süa ativité ia por l’ann y i majeri intervënc, podëise lí t’La Usc di Ladins di 9 de forá  (Stödafüch Lungiarü)