La Usc di Ladins

I Stödafüs d’Al Plan á podü fá gran festa, en San Florian ai 5 de ma, canche al é gnü tigní la benedisciun de so tanch nö. Y con chël de él gnü mené ofizialmonter "en ponsiun" le tanch vedl Mercedes, co ea belo en sorvisc dal 1993 encá. Cumpré en auto nö é dagnora na gran spëisa, porchël ciarun, tan ennant che ara vá, ince da vëne ennant le vedl. I auti dai stödafüs é gonot ciamó bogn. Ince sce ai á trec agn y ne respogn magari nia plü ales normes por ester en sorvisc, é i mesi ciamó bogn y con püc chilometri, porchël pói bun gní adorés altró. Ince i Stödafüs d’Al Plan á belo l’ann passé motü man da chirí en cumpradú y enló ne s’éssun bën nia enmaginé che le cumpradú foss sté le Stat talian, tres le Ministêr dla Defenüda. Ensciö ésera garatada che le tanch vedl vir śën ennant, plü avisa al sorvisc de na misciun umanitara tal Niger african. En pü’ de fortüna y ince na storia enteressanta, che i s’án lascé cunté dal stödafü Michael Call, co s’an â tut sora da vëne ennant le meso.

La intervista podëise lí t’La Usc di Ladins di 16 d’agost  (Intervista: Pablo Palfrader)