La Usc di Ladins

Na neva area enjignèda per ge dèr l’ocajion a joegn de se desvampolèr e se arcedèr te la bela disciplines del freestyle caraterisea ades la perferida de val. La é stata averta e inaudèda en vender ai 23 de jugn te Fraine, l bel raion vert dedicà a sport e spas anter Poza e Pera e l à inom »Fassa Gravity«.

Vejin al ciamp olache d’invern i bec picoi pel fèr la pruma proes coi schi e chi de ogne età va a se arcedèr sui schi strenc, e che d’istà se empienesc de jent che va a spas con fantolins, cians e rodes, ades l é na atrazion neva, nasciuda da la bona colaborazion anter la Coprativa sozièla Inout, l Ski Team Fascia, l grop Fassa Free Ski, la Scola de Schi de Vich e l Comun de Sèn Jan. 

Tel »Fassa Gravity« i pascioné de sauc acrobatics, evoluzions e sgoi podarà fèr alenament e miorèr sia tecniches de gra ai èrc studié fora e enjigné dal alenador del Fassa Free Ski Simone Canal e dai joegn del teritorie che da egn i spetèa la realisazion de n parch desche chest, che tol ite n tapei da lastech profescionèl, n trampolin semiprofescionèl, n aur track per l’acrobatica jabas e n sistem de strutures per reprodur n portoi de neif sintetica e se arcedèr per la competizions da d’invern. 

E no l é dut, ajache l é en program de smaorèr amò la perferida tel davegnir con slack line, jeghes, materièi e etres elemenc per fèr evoluzions a corp ledech.

De più su La Usc stampèda de vender ai 30 de jugn.  (LG)