La Usc di Ladins

Endèna che tel rest del Trentin va amò inant la polemiches sul provediment de la Provinzia de sperlongèr l temp de scolina ence per l meis de messèl, te Fascia con en lunesc ai 7 de jugn la scolines à endò avert si ujes. Chiò les ge va dò al calandèr turistich e per chest, ajache les é avertes de messèl e de aost, de jugn e de setember les sera. Con la delibera dai 14 de mé, la Jonta provinzièla defat, te chest an particolèr segnà dal Covid, à volù ge dèr l met a la families de manèr i picioi a scolina per n auter meis. »La dificoltèdes de n an de scola canche n muie de sezions de scolines provinzièles e equiparèdes é states metudes en carantena per la pandemia – se lec tel provediment de la Provinzia – e amò apede l besegn palesà da n muie de families diretamenter enteressèdes, à portà la Jonta provinzièla a la dezijion de slongèr l calandèr scolastich con n sperlongiament del servije.« 

Coscita te Fascia la scolines, dò aer serà bele per dotrei dis dal prum ai 5 de jugn, les é endò avertes da en lunesc ai 7 fin a mercol ai 30 de jugn. La families che volea se emprevaler de chest servije cognea fèr la iscrizions online dai 17 ai 23 de mé. Te la prozedura online de conferma ogne familia cognea spezifichèr la setemèna de frequenza en più, ajache ogne una podea cerner se fèr jir si fies demò una, doi o duta trei la setemènes. L’orarie de scolina é valif al solit, l temp sperlongià da doman bonora o da sera é stat ativà demò con più che 5 bec scric ite per la scoles con una sezion e con più che 7 bec per la scoles con più sezions. L’é stat garantì ence l servije coi pulmins per chi bec che l durèa ence inant. Per la conferma de la frequenza la families à cognù paèr na quota de 50 euro.

Dut l'articol, con la conscidrazions de la referentes de la maestres e i dac su la iscrizions te Fascia é da poder lejer su La Usc stampèda de vender ai 11 de jugn.  (Monica Cigolla)