La Usc di Ladins

Ence chest istà rua l Circen Dolomites Festival, la rassegna di evenc da circo più auta de la Tèlia, metuda a jir dai jocolieres de Fascia de Circensema col sostegn de la Coprativa sozièla Inout, ruèda chest an a la terza edizion.

Per duta la pruma setemèna de aost, dal 1 a l’8, l’èrt de jocolieres e acrobac de livel internazionèl ge darà color e legreza a la piazes e ai ciantons più bie di paìjes e di crepes de Fascia.

L’edizion 2021 porta dant n grum de novitèdes, prum de dut n festival che per la pruma outa tol ite dalbon duta la val, con na lingia de artisć neves che farà sia ejibizions da Moena a Cianacei. 

Te la pruma ores del domesdì i artisć sarà empegné semper sa mont, Ciampac, Val Duron, Bufaure o Ciadenac, da sera enveze la raprejentazions sarà te la piazes di paìjes, aldò de n program che se pel veder online su www.circendolomitesfestival.com.  

L’é sacotenc inomes de gran nonzech, i Black Blues Brothers per ejempie, cinch acrobac dal Kenia che à engaissà passa 300 mile spetadores de dut l mond, ence Papa Francesch e l Prinz Alberto de Monaco; dapodò i doi componenc de ‘La Sbrindola!’, che se à vedù più outes en televijion e ti video de Caparezza.

Steila del festival sarà la picola sciumia Giochele, l personaje da grignèr de la contìa col medemo inom de la tradizion leterèra ladina, che chest an doventa ence cartoon tel video de promozion realisà en animazion digitèla dal joen designer Fabian Mosele.   (Cri.m)