La Usc di Ladins

Ël ie nasciù ai 31 de lugio dl 1934 a Urtijëi, tla cësa Dorigo. L ie unì cunsacrà preve a Bulsan – Gries de merz dl 1958. A Urtijëi àl pona dit mëssa nevela, na gran festa per duta la pluania y l luech. 
Danter l 1958 y l 1968 fòvel stat caplan a Partschins, Marling y Maria Himmelfahrt/Bulsan. Dal 1968 nchin al 1989 àl nsenià religion tla scoles mesanes de Bulsan. Dadedò à Prugger menà l ufize de catechesa dla curia nchina tl 2002. 
Per bën 38 ani fòvel nciarià dla cura d’anes di vierces de Südtirol y ti stajova daujin cun gran mpëni y dedizion. 
Dal 1990 nchin al 2009 fòvel nce respunsabl per la cura d’anes dla valedes ladines. Te chësc tëmp se àl cruzià che l vënie dat ora libri de liturgia y nseniamënt de religion tla rujeneda ladina. 
Per si meric tl ciamp dla catechesa, prumozion dl ladin te scola y tla liturgia y per si servisc coche preve y curatëur d’anes iel unì unerà tl 2018 dal vëscul Ivo Muser. Sn. August ie stat na persona scialdi stimeda per si fé da plajëi y si bontà. Ël se tulova dl’aurela de scuté su, de judé la jënt. Te si lëur fòvel daviert per nuviteies y mudamënc y l savova da ntujiasmé y cherdé persones per l servisc a Gejù, sibe te scola che nce te dlieja. 
Che l pausse tla pesc te Chël Bel Die!