La Usc di Ladins

Ince tratan l’ann 2019 á l’Uniun di Ladins dla Val Badia dé n contribut fondametal por le svilup dl lingaz y dla cultura ladina. Tres n program ampl y desvalí ti éra jüda incuntra ales esigënzes dla jënt dla valada y ti á dé espresciun a süa cultura te na manira dinamica, realisan insciö sü obietifs y sües finalités statutares.
Dlungia les reuniuns periodiches dl Consëi s’á i mëmbri anuzé dla poscibilité pitada dala tecnologia por lauré te na manira tres plü asvelta y efiziënta. Dantadöt i “boards” de “Monday” é stá ütli por valuté les propostes de publicaziuns y i proiec nüs, se confronté, baraté fora impulsc y minunghes, yii. Chësta poscibilité é en chësc ann gnüda ampliada tres la condivijiun dla plataforma cun les atres valades ladines.
Le laur de volontariat di aconsiadus y dles aconsiadësses dla Uniun di Ladins, sciöche ince chël de d’atres porsones che á dé ca so tëmp y á lauré debann, é sté de gran valüta por la realisaziun dles publicaziuns, dles manifestaziuns y di proiec. Fondamental por le bun garaté dl’ativité ampla dl’assoziaziun é sté le contribut finanziar da pert dl Assessorat por la Cultura Ladina dla Provinzia de Balsan, dla Regiun Autonoma Trentin-Südtirol, di Comuns dla Val Badia y dla Cassa Raiffeisen Val Badia.
Danter les ultimes publicaziuns che é gnüdes dades fora él da ciafé le “Glossar por la gastronomia y hotelaria” (che i gnará pité a düc i eserzizi, en colaboraziun cun les Assoziaziuns Turistiches); “Tëmp de stories” – Liber por imparé la silabaziun; Cianté Ladin III – Cianties Sacrales por cors tl ladin dla Val Badia; “Les aventöres de Conni” – racoiüda de 8 stories por mituns, y “Albolina” – liënda fasciana de K.F. Wolff.

En vëndres, te otedé, sentada generala cun lites

Ai 21 de forá 2020 dales 20:00 gnaral tigní tla sënta dl Istitut Ladin Micurá de Rü la sentada generala di mëmbri dla ULVB. Al gnará presenté te na manira plü monüda la relaziun d’ativité y rendicunt finanziar dl 2019.
3 agn él passé da canche al é sté les ultimes lites y en chësc iade gnarara indó da lité; düc i mëmbri ará la poscibilité da se mëte sön lista. Le presidënt gnará lité te n secundo momënt dal consëi nü: do 6 agn ne se metará le presidënt da sëgn, Michael Moling, nia plü a desposiziun por chësta inciaria. Ala fin dles lites gnarál presenté le program por chësc ann 2020.