La Usc di Ladins

Al é bele passé diesc agn da canche la ciamena dal guant »Neores« á davert sües portes, tl zënter di stöda­füch, a La Ila. L’iniziativa ê piada ia dal Comun de Badia y deplü ëres s’â metü a desposiziun por porté inant chësc sorvisc; feter dötes fej ciamó pert incö de chësc proiet. Ares é de nü y se barata jö por tigní davert vigni vëndres la ciamena dal guant. Les volontares é Agnes, Carla, Fefa, Ida, Irene, Monica, Pia, Rosalia y Susi.

Nia ma guant
»Neores« é na ciamena dal guant, mo canche an röia da porta ite vëigon che al n’é nia ma patüc da se vistí, mo ince n gröm d’ater patüc che pó gní d’öga a families cun mituns, sciöche p.ej. bagheli, scagns por l’auto, mandli de peza, libri, jüc, tasces da scora y ii. Vigni toch vëgn paié n euro. Ara se trata de na soma simbolica che vëgn spo surandada en benefizënza, a sostëgn de proiec desvalis.

Proiec de solidarieté
Vigni ann vëgnel trat ite chi 400 euro y tratan chisc diesc agn él gnü sostigní deplü proiec de solidarieté. Danterater é les ofertes gnüdes surandades a siur Toni Fiung, ala fondaziun de siur Heinrich Videsott, ala uniun dles families catoliches dl Südtirol – KFS por le proiet »Familie in Not«, al Bäuerlicher Notstandfond, a Cherubina Ploner da Pidrô por sostigní proiec tla Romania y a deplü vëdues jones de Südtirol.
Tl pröm él sté tröpes ëres da La Ila che á condüt adalerch guant y d’ater patüc y ince a se tó gnôl scialdi por­ sones dl post. Chësc é indere n pü’ mudé, deache ti ultims tëmps röiel adalerch plülere jënt da foradecá, en particolar da Puster, o personal che laora te nosc raiun tratan les sajuns turistiches. La pandemia á ince n pü’ archité sö – sciöche döt
cant – l’ativité de »Neores«, che á messü stlüje les portes tratan i mëisc de lockdown. Le guant che vëgn metü a desposiziun é de secunda man,mo al é bel nët y te de bunes condiziuns. Porchël inviëia les ëres da s’infidé y jí a dé na odlada, se chirí fora val’ toch che podess gní d’öga.­ Sambëgn é ince le guant y l’ater patüc che vëgn condüt adalerch dër bëgnodü.

Orar de daurida
La ciamena dal guant »Neores« é daverta vigni vëndres dales 14.00 ales 15.30, tl salf dl zënter di stödafüch, a La Ila alta. 





 (kp)